Sulatin Blg.3 - Anak

Ang kantang "Anak" ni Fred Panopio ay isang malalim at makapangyarihang awit na tumatalakay sa relasyon ng magulang at anak, pati na rin ang mga pagsubok na dumarating sa buhay ng isang kabataan. Sa pamamagitan ng mga liriko ng kantang ito, ipinapakita ang masalimuot na proseso ng paglaki, pagkakaroon ng sariling desisyon, at ang mga posibleng pagkakamali na maaaring magdulot ng pagsisisi. Sa bawat awit, nagsisilbing paalala ang kantang ito sa lahat ng tao na ang pagmamahal ng magulang ay hindi matitinag, at ang mga pagkakamali ay may kasamang pagkakataon para sa pagbabago isang aral na tatak sa isipan ng bawat makikinig.

Sa simula ng kanta ay ipinakita ang pnanabik ng mga magulang sa pagsilang ng kanilang anak sa mundong ibabaw. Makikita sa kislap ng kanilang mga mata na ang bawat hakbang ng kanilang anak ay nagbibigay ng pag-asa at saya. Ang mga magulang ay puno ng tuwa at pagmamahal, at ipinapakita nila ito sa pamamagitan ng mga simpleng bagay tulad ng pagmamasid sa bata habang natutulog at pag-aalaga sa mga pangangailangan nito. Laking pasasalamat ng magulang sa bawat sandali na makasama ang kanilang anak. Sa kabila ng mga sakripisyo at hirap na dulot ng pagpapalaki ng anak, ang kanilang pagmamahal ay hindi matitinag. Ang mga detalye ng kantang ito tulad ng pagtimpla ng gatas ng nanay at ang kalong ng tatay ay nagsisilbing simbolo ng walang sawang dedikasyon ng mga magulang sa kanilang anak. Sa paglipas ng panahon, ang kanilang anak ay naghahangad ng isang kalayaan at sariling desisyon.  Ang mga magulang, na noon ay malugod at masaya sa mga simpleng bagay, ay nakakaramdam ng pagkabahala kapag ang anak ay nagsimulang magbago. Sa kabila ng mga pagsubok at pagsalungat sa payo ng magulang, nagmimistulang isang masalimuot na paglalakbay para sa anak isang paglalakbay ng paghahanap sa sariling landas, ngunit hindi ito naging madali. Sa pagdating ng mga pagsubok at pagkakamali, ipinakita ng kanta ang paglalakbay ng anak patungo sa pagsisisi. Ang anak, na naligaw ng landas at nalulong sa bisyo, ay napagtanto ang halaga ng mga sakripisyo ng magulang. Ang mga tanong ng ina "Anak, ba't ka nagkaganiyan?" ay nagsisilbing isang pagbabalik-loob sa mga magulang, na sa kabila ng lahat ng pagsubok, ay patuloy na nagmamahal at nag-aalaga sa anak. Ang mga luha ng anak ay isang simbolo ng pagbabalik-loob at pagkakaroon ng pagninilay-nilay sa mga desisyon na ginawa. Dito ay nagsisimula ang tunay na pagkatuto at pagbabago, na siyang naging pinakaimportanteng aral na hatid ng kantang ito.

Ang kantang "Anak" ay nagsisilbing gabay at paalala tungkol sa halaga ng pagmamahal ng magulang at ang kahalagahan ng pagninilay-nilay sa ating mga desisyon. Ipinapakita nito na ang mga pagkakamali ay bahagi ng ating paglalakbay at may kasamang pagkakataon para sa pagbabago. Sa huli, ang pagmamahal ng magulang ay isang walang katumbas na yaman, samantalahin ang bawat pagkakataon upang magpasalamat at magbago bago pa man maging huli ang lahat.